Nelu Bulanin

“Om Swastiastu” 

    Titiang reraman ipun dahat garjita manahé santukan Ida, Dané lédang arsa nagingin pangaptin titiang, prasida ngrauhin ring acara puniki. Mantuk ring kaledangan Ida dané, titiang sakulawarga wantah prasida ngaturang rasa suksmaning manah. Ampurayang indik kakaonan genah miwah tata basa panyanggran titiang sakulawarga, riantukan tambet titiang kalintang. Sampun majanten titiang nénten pacang prasida ngwalesang pasuecan Ida, Dané, dumogi Ida Hyang Widi Wasa pacang arsa mapaica pangwalesnyané manut swadharma miwah yasa kértin druéné soang-soang. 

     Ida, Dané para undangan sané baktinin titiang, taler para sameton sané tresna sihin titiang. Sané mangkin lugrayang titiang pinaka reraman ipun nunas galah samatra anggén titiang nyihnayang anggan pianak titiang sané pacang nelubulanin. Inggih mungguing pianak titiang sane nelubulanin rahinané mangkin mawasta I Putu Agra Maha Pramadana.


Duaning sakadi ajahan umat Hindu, Upacara Nelu Bulanin medue artos upacara bayi sane sampun 3 Bulan utawi mayusa 105 hari manut ring pawukon, punika piranti sarana penyucian bayi. Krana pianak titiang sampun mayusa 105 hari ring dinane mangkin kalaksanayang upacara Nelu Bulanin, mawinan  panca indran pianak titiang sampun aktif punika ngawinan makta dampak positif lan negatif ring atman utawi roh pianak titiang. Tetujonnyane mangda pianak titiang mresidayang waspada antuk pengaruh – pengaruh panca indra. Antuk punika titiang mapinunas mangda Ratu, Ida, Dané utawi sameton titiang sané sampun ledang ngrauhin ring upakara nelubulanin puniki mangdané lédang nyarengin ngastitiang ring Ida Sang Hyang Widi Wasa. Mangdané ring sajeroning pamargi puniki prasida kasidaning lan ngamolihang karahayuan lan kasukertan ring jagaté.

    Inggih kadi asapunika titiang prasida nagingin panyembramané puniki dumogi wénten pikenohnyané. Malih apisan titiang matur suksma, taler nunas ampura yéning wénten iwang antuk titiang nitenin panyanggrané puniki. Sané mangkin lédang Ida, Dané masandekan, jumujug ring genah bhogané sané sampun kacumawisang. Malih ajebos yening sampun wusan anyita rasa bhoga, durusang ngambil acara bebas. Inggih cutetang titiang antuk ngaturang parama santih 


“ Om Santih Santih Santih Om “